Լավ բիսկվիտ պատրաստելու գաղտնիքները

Ո՞վ չի սիրում ուտել թեթև և նուրբ թխվածք: Էլաստիկ, փքուն, փափուկ. ահա մեր նյութի գլխավոր հերոսի բնութագիրը: Բիսկվիտի խմորն օգտագործում են  տորթերի, ռուլետների, պիրոգների և ամենազանազան թխվածքների պատրաստման ժամանակ:

Եվ այսպես, ձեզ անհրաժեշտ կլինի ձու, շաքարավազ և ալյուր: Իսկ այժմ ծանոթացեք բիսկվիտի պատրաստման շատ կարևոր նրբություններին:

Բիսկվիտի պատրաստման գաղտնիքներ

  1. Հետևեք բաղադրիչների ճիշտ հարաբերակցությանը: Ահա ամենահաջողը. 6 ձու, 1 բաժակ շաքարավազ, 1 բաժակ ալյուր, 1 պտղունց սոդա կամ 0,5թ/գ փխրեցուցիչ:
  2. Մինչ կհարեք ձվերը, դրանք 10-15 րոպե դրեք սառցախցիկում, որպեսզի լավ սառչեն:
  3. Ձվերը կոտրեք խորը ամանի մեջ և հարեք ամենաբարձր արագությամբ: Հարիչի ոտքերը պետք է պահել վեր, որ միայն հազվադեպ դիպչի ամանի հատակին:

  4. Երբ զանգվածը մեծանա 4-5 անգամ, քիչ չափաբաժնով, դանդաղ ավելացրեք շաքարավազը:
  5. Անջատեք հարիչը և հենց տվյալ զանգվածի վրա մաղելով լցրեք ալյուրը և խառնեք գդալով, ապա ավելացրեք սոդան կամ փխրեցուցիչը և կրկին խառնեք: 

  6. Որոշ խոհարարներ խորհուրդ են տալիս սոդայի կամ փխրեցուցիչի հետ օգտագործել քացախ կամ կիտրոնաթթու, սակայն ոչ թե նախապես գդալի մեջ խառնած, այլ առանձին խմորի մեջ լցնելով:
  7. Ձևամանը պատեք խոհարարական թղթով, վրան ցանեք ալյուր և նոր միայն լցրեք խմորը: Խմորով լցված ձևամանը դնում ենք նախապես միացված ջեռոցում և եփում 180 աստիճանում:

  8. Երբ կտեսնեք, որ ծայրերը, վարդագունել են, իսկ մեջտեղի հատվածը դեռ մի փոքր թաց է, աստիճանաբար նվազեցրեք ջերմաստիճանը: Բիսկվիտը եփվում է գրեթե 45 րոպե: Եփվելու ժամանակը կախված է ձևամանի տրամագծից:
  9. Թխվելու ընթացում լավ կլինի ջեռոցի դռնակը չբացեք, քանի որ բիսկվիտը կարող է «նստի»: Անհրաժեշտության դեպքում բացեք միայն շատ փոքր:
  10. Պատրաստի բիսկվիտը թողեք, որ սառչի հենց ձևամանի մեջ, ապա նոր միայն հանեք միջից:

 

Понравилась статья? Поделиться с друзьями: